ინიციატივების შედეგად მნიშვნელოვანი პრობლემები მოგვარდა დევნილთა სამ საცხოვრებელ ადგილზე: ილია ჭავჭავაძის №58-ში, ჭომის დევნილთა დასახლებასა და ავტოქარხნის დასახლებაში, კოტეჯი №2-ში.

საერთო ჯამში, პროექტმა 195 დევნილ ოჯახში მცხოვრები 582 ადამიანი მოიცვა. თემში განახლდა ამორტიზებული ღობეები, დასუფთავდა დასახლებების მიმდებარე ტერიტორიები და აღმოიფხვრა დატბორილი სარდაფების პრობლემა, რაც მოსახლეობისთვის უსაფრთხოების, სანიტარული და ყოველდღიური ცხოვრების სირთულეებს ქმნიდა დიდი ხნის განმავლობაში.

ინიციატივამ დევნილთა ცხოვრების პირობები გააუმჯობესა და თემში გარემოზე ზრუნვის, შიდა მობილიზაციისა და კოლექტიური პასუხისმგებლობის პრაქტიკა გააძლიერა.

პირველი ინიციატივის ფარგლებში, აფხაზეთის ქუჩის 8 კორპუსში, სტატისტიკის შენობასა და 9 აპრილის ქუჩის 10 კორპუსში მცხოვრები 906 დევნილი ოჯახი (დაახლოებით 3,000 ადამიანი) ჩაერთო ადგილობრივი ქალების გააქტიურებაზე ორიენტირებულ პროექტში. სკვერის გამწვანებისა და დასუფთავების აქციამ, მარადმწვანე ნერგების დარგვის ჩათვლით, ხელი შეუწყო ჯანსაღი და თანაზიარობითი გარემოს შექმნას.
მეორე ინიციატივამ, რომელიც იგივე დასახლებაში განხორციელდა, მიზნად დაისახა უსაფრთხოებისა და ინფორმირებულობის გაზრდა. სადარბაზოებში დამონტაჟდა საინფორმაციო დაფები, რომლებზეც განთავსდა ინფორმაცია ძალადობის პრევენციის სერვისებზე და ცხელ ხაზებზე. შედეგად, გაიზარდა ქალების ინფორმირებულობა და შესაძლებლობა, საჭიროების შემთხვევაში, დროულად მიიღონ დახმარება.
ორივე ინიციატივამ თემში გააძლიერა ქალების როლი, საერთო პასუხისმგებლობის განცდა და ხელი შეუწყო სოციალურ ერთიანობას.

ხონის მუნიციპალიტეტში, დევნილთა დასახლებაში, სამოქალაქო ინიციატივის ფარგლებში განხორციელდა სკვერის გამწვანების აქცია, რომლის მიზანი იყო თემში არაკონფლიქტური, არაძალადობრივი და უსაფრთხო გარემოს შექმნა.
ინიციატივამ მოიცვა 4 კორპუსში მცხოვრები დევნილი ოჯახები, სულ 160 ოჯახი, 546 ადამიანი.
სკვერის მოვლა და გამწვანება არა მხოლოდ ფიზიკური სივრცის მოწესრიგებას, არამედ თემის შიგნით ურთიერთობების გაუმჯობესებასა და თანაცხოვრების კულტურის გაძლიერებას ემსახურება.
პროექტმა ხელი შეუწყო ბავშვებისთვისა და ზრდასრულებისთვის ჯანსაღი და პოზიტიური სივრცის შექმნას, რაც აუცილებელია კონფლიქტების პრევენციისა და თემში მშვიდობიანი თანაცხოვრების განსამტკიცებლად.

დევნილთა სამხედრო დასახლებაში ორი ინიციატივის განხორციელებით სრულად მოგვარდა 24-ე კორპუსში მცხოვრები მოსახლეობის ხანგრძლივი პრობლემები. სარგებელი მიიღო 452 ოჯახმა, სულ 950-მა ადამიანმა.
ინიციატივებმა უზრუნველყო სარდაფების დატბორვის პრობლემის აღმოფხვრა და კორპუსის მიმდებარე ტერიტორიის სრულყოფილი დასუფთავება.
აღნიშნულმა ნაბიჯებმა მნიშვნელოვნად გააუმჯობესა საცხოვრებელი პირობები, შეამცირა ჯანმრთელობის რისკები და გაზარდა დევნილთა უსაფრთხოებისა და კეთილდღეობის დონე თემში.

გამყოფ ხაზთან მდებარე სოფელ კოკში, სკოლის გარე ტერიტორიაზე განხორციელებული სამოქალაქო ინიციატივით მოგვარდა ქალებისა და ბავშვების უსაფრთხოებისა და კომფორტისათვის მნიშვნელოვანი საკითხი.
საინიციატივო ჯგუფის წევრებთან შეხვედრების შედეგად გამოიკვეთა, რომ სკოლის მიმდებარედ, სადაც სკოლის დასრულების შემდეგ დედები და ბავშვები მიკროავტობუსებს ელოდებიან, არ არსებობდა ელემენტარული ინფრასტრუქტურა - კონკრეტულად, მოსაცდელი ზონა.
ინიციატივის ფარგლებში შეიძინეს და დაამონტაჟეს ორი ძელსკამი, რაც მნიშვნელოვნად გააუმჯობესებს ყოველდღიურ პირობებსა და უსაფრთხოების განცდას სკოლის მიმდებარე ტერიტორიაზე.
ეს მცირე, მაგრამ მნიშვნელოვანი ცვლილება უკვე ეხმარება თემის ქალებსა და ბავშვებს ტრანსპორტის მოლოდინში კომფორტულად იყვნენ და თავი უსაფრთხოდ იგრძნონ.

ქალაქ ხობში, მოსწავლე-ახალგაზრდობის ცენტრთან არსებული სკვერის მოვლა-პატრონობის ინიციატივაში ჩართულმა დედებმა შექმნეს უსაფრთხო და მეგობრული გარემო 350-მდე მოზარდისთვის. პროექტმა შეამცირა ბულინგის შემთხვევები და გააძლიერა კოლექტიური ზრუნვის პრაქტიკა. სკვერის მოსაწესრიგებლად ქალებს გადაეცათ შესაბამისი ტექნიკა.

სოფელ ნოჯიხევში განხორციელებული მეორე ინიციატივა ძალადობაგამოვლილი 2 მარტოხელა ქალის სოციალურ და ეკონომიკურ გაძლიერებას ისახავდა მიზნად. მიღებული ტექნიკით ისინი არა მხოლოდ საკუთარ შემოსავალს ზრდიან, არამედ ეხმარებიან თემის სხვა ქალებსაც. ინიციატივამ გააძლიერა თემში სოლიდარობისა და მხარდაჭერის კულტურა.

სოფელ გოგოლესუბანში ჩატარებული გამწვანების აქცია მიზნად ისახავდა ახალგაზრდებისთვის ჯანსაღი და მეგობრული სივრცის შექმნას, რომელიც ხელს შეუწყობს სოციალურ ჩართულობასა და ზიანის მომტანი ქცევების პრევენციას.
ინიციატივა პასუხობდა იზოლაციისა და კომუნიკაციის პრობლემებს, რაც აზარტულ თამაშებზე დამოკიდებულებას იწვევს მოსაზრდებში და ბულინგის გავრცელებას უწყობდა ხელს.
ქალების ხელმძღვანელობით განხორციელებულმა პროექტმა გააძლიერა ახალგაზრდების ჩართულობა საზოგადოებრივ ცხოვრებაში და თემში ჯანსაღი ურთიერთობების გაძლიერებას საფუძველი ჩაუყარა. აღნიშნული ინიციატივიძთ სარგებელი მიიღო 1224-მა მაცხოვრებელმა, მათ შორის 100 მოზარდმა.

პირველი ინიციატივით, სოფელ საჩინოში, ადგილობრივმა სოციალურად დაუცველმა ქალმა, რომელიც ეკლესიის მიმდებარე სასაფლაოს საკუთარი ძალებით უვლიდა, პროექტის ფარგლებში მიიღო საჭირო ტექნიკა (მათ შორის ბალახის საჭრელი), რაც მას სამუშაოს შესრულებას გაუმარტივებს.
ინიციატივამ ხელი შეუწყო თემში ქალების გააქტიურებასა და საერთო პასუხისმგებლობის განცდის გაძლიერებას. აღნიშნული ინიციატივით სარგებელი მიიღო 100-მდე ადამიანმა.

მეორე ინიციატივის ფარგლებში, სამი კონფლიქტით დაზარალებული ქალი დაფნის კულტურის გაშენებისთვის საჭირო ნერგებით აღიჭურვა, რამაც ისინი ეკონომიკური დამოუკიდებლობის გზაზე დააყენა. პროექტმა გააძლიერა ქალების თვითდასაქმების პოტენციალი და ხელი შეუწყო მათი შვილების კეთილდღეობასაც. სარგებელი მიიღო 3 ოჯახმა, თუმცა ინიციატივას ფართო სოციალური გავლენა აქვს თემზე.